Puno ng drama at tensyon ang naganap na ika-limang weigh-in at elimination ceremony sa “The Biggest Loser Pinoy Edition,” kung saan si Eric Limatog ang tinanggal ng mga kasamahan niya sa Biggest Loser Camp.Nagbanta kasi si Eric na babalik siya sa dating pamumuhay kung siya ang matatanggal sa kompetisyon. Nagmatigas din ito nang subukang palakasin ang loob niya ng host na si Sharon Cuneta.
Ikinuwento pa ng Megastar kung paano niya tinanggap ang mga pangungutya sa kaniyang pagtaba, at ibinida rin na nawalan siya ng 13 lbs. simula nang magsimula ang programa.
Ngunit ganun man ang ipinakitang asal noon ni Eric, mukhang nagbago na ang ihip ng hangin ngayon. Sa isang panayam, sinabi ng 22-taong binata na pinagsisisihan niya ang mga nasabi at ginawa noong huling gabi niya sa camp.
Taliwas sa kaniyang binitawang salita noon, patuloy siyang nagsisikap ngayon sa pagpapapayat.
“Gusto kong patunayan na lumalaban pa rin ako. Mas masipag na ako ngayon. Pati na rin ang mga pamilya, kamag-anak, at kaibigan ko, natuturuan ko sila sa tamang pagkain at sa tamang ehersisyo,” kuwento ni Eric.
Dagdag pa niya, laking pasasalamat niya at nakapasok siya sa show. “Totoo palang nakaka-inspire ang Biggest Loser. Para sa akin, hindi lang ito simpleng programa kasi binago niya hindi lang ang buhay ko kundi pati na ang buhay ng mga tao sa paligid ko. Sana marami pa akong maturuan.”
Matapos maging Biggest Loser noong Week 5, bagsak sa ilalim ng yellow line si Eric kasama si Angela sa kanilang unang weigh-in bilang ‘singles.’ Ang dating pulis na si Larry naman ang itinanghal na Biggest Loser of the Week, matapos magbawas ng walong pounds o 3.86% ng kaniyang dating timbang.
Siguradong mas iinit pa ang bakbakan ng mga bigating Pinoy dahil mas ramdam na nila ngayon ang kumpetisyon bilang mga indibidwal na naglalaban-laban.
Sa paparating na workouts kasama sina Jim Saret at Chinggay Andrada at challenge kasama naman si Derek Ramsay, susubukan ang katatagan ng loob nina Alan, Angela, Art, Eboy, Joy, Hazel, Larry, Raffy, Ryan, Winwin.
Sa kanilang ika-pitong linggo kasi sa camp, mas madalas na silang dinadalaw ng pangungulila sa mga mahal sa buhay at maging ng pagod sa mga aktibidad.
Dagdag pa riyan ang mga twist sa show, tulad na lang ng pagsasara sa gym ngayong linggo. Alamin kung ano'ng gagawin ng mga bigating Pinoy para makapag-workout maski walang equipment na magamit.
Abangan din ang pinakabagong development sa namumuong pagtitinginan nina Raffy at Hazel at ang isa na namang pasabog na twist na ikagugulat ng mga contestant at manonood.
Huwag palampasin ang nakaka-inspire na laban ng mga Bigating Pinoy sa “The Biggest Loser Pinoy Edition,” mula Lunes hanggang Biyernes, pagkatapos ng “Minsan Lang Kita Iibigin” sa ABS-CBN.
Para sa news at updates sa programa, bisitahin ang http://biggestloserpinoyedition.abs-cbn.com,i-like ang http://www.facebook.com/abscbn.biggestloserpinoyedition sa Facebook, o sundan ang @BLPinoyEdition sa Twitter.
No comments:
Post a Comment